| Joe's profileSkypieaPhotosBlogGuestbook |  Tools  Help |
Skypieahttp://www.xanga.com/Judoe June 21 同"容"光玩遊戲星期六入左大嶼山長沙玩
同行既有豬峰同恆爺
似乎呢個活動已成為每個夏天都會做既野
感覺十分好
之後係梅窩食埋飯
十一點返到屋企
__________
我地各自行左一圈...
圈有大有細
然後再返到黎起點
下次
你會找尋怎樣的浪漫?
__________
星期日朝早約左幾個鄰居去YKK打波
frd"lian"frd咁....今日打波有十五個人
多到有點混亂.....哈
天氣好焗好熱
打到十一點零走人
右腳近膝頭位置比人撞瘀左
__________
連續晒左兩日
黑左好多 June 15 爆呔好耐無寫過
一來無咩心情寫
二來無咩特別事發生
今晚有一趣事
收工返娘家食飯
食完飯正想返屋企
諗住著鞋....
一坐低....啪
OMG~條褲後面竟然爆呔
個裂口有一隻手掌咁大...
好睇係屋企爆
我聽到聲之後大笑左一陣...哈
之後換左細佬既衫, 拎埋返工袋去市中心買返條褲
G2000做緊三件貨品三折
我買左兩條褲同一件裇衫
人生中首次爆呔
我實在接受不了這事實
__________
將件事講左比機因知
一路搭輕鐵一路笑
笑足成程
__________
醫療輔助隊
8月9日
__________
仲有兩星期就出發 May 10 檸檬批變左色!!星期六上晝去做gym
一邊做gym一邊睇NBA Playoff, 湖人對火箭第三場...
下晝約左機因返中大食檸檬批
之後去MK睇相機袋
因為佢塞車, 所以我先去眾志食個Tea
點左芝腿吞拿魚鴛鴦三文治, $15連凍飲
當我埋櫃檯拎野食
個姐姐係雪櫃拎個三文治出黎比我個刻
我有點呆左, 無諗過三文治係雪住的, 我諗住係即整tim!
係眾志外面食野真係種享受
除左感覺舒服之外, 仲有D麻雀同你一齊食
當有人食完野離開既時候, 三五隻麻雀會飛上張枱度開餐
機因到左之後一齊搭校巴去med can食檸檬批
今次食既檸檬批顏色同以前唔同
以前係黃色, 今次食既係青綠色, 青綠色夾層入面仲有D一粒粒綠色既野
雖然味道上無咩分別, 但我比較鐘意以前既黃色
機因帶左K200D同31公主出黎
難得有機會用下公主鏡wo, 當然唔會放過呢個機會
係中大試影左幾張, 感覺就係....唔識用!!
係中大逗留左兩個鐘頭之後去旺角睇相機袋
__________
係眾志收到豬峰電話, 講左大約十零分鐘吧 (唔記得了)
原來佢就黎去沖繩旅行!
沖繩...我都想去
但比起沖繩, 我更想去內蒙
我會去內蒙, 就係呢個夏天
就算好耐唔contact都唔會感覺陌生
同豬峰講完電話之後就有呢種感覺
__________
今日係樓企樓下見到恆爺
原來佢一家人搬左去新墟
佢仲叫我有機會去佢度食飯
食飯啊...中學階層係成日上佢屋企痴餐的啊!!
__________ May 04 小坑村趕及係勞動節前買左部K200D
買左部相機後
第一樣野想做既就係返去小坑村
返去一個二十幾年前住過既地方
細個(小學低年級既時候)覺得小坑村係一個好遠好遠既地方
因為要搭的士先去得到
後來大個左睇到地圖先知原來咁近兆康
剛好買左部機又有假期
最好就係重返舊地睇下同試用相機
四點半係兆康出發
向途人問路後好快搵到小坑村
從麻麻口中得知, 我三兩歲個陣同埋爺爺麻麻住係小坑村
後來搬左去蝴蝶村附近既安置區, 直到小學一年班先搬去良景
唔係佢講我都唔記得自己住過係個度
雖然小學一年班已經搬左去良景, 但當時麻麻仲住係小坑村
間中都會返去小坑村食飯
亦因為呢個原因, 我對小坑村既野仲有些少記憶
係村入面行左一陣
已經見到間熟識既士多, 而家叫"新記", 唔知廿幾年前叫咩名
印象最深既係個度有$2.5一枝維他奶賣
爺爺間中會同我去買維他奶, 之後訓係帆布床上面飲, 爽!!
今次再黎到呢間士多, 內裡既間隔無點變, 只係賣既野比以前少左好多
士多入面有間房比人打麻雀, 同以前一樣
穿過士多, 直行就到我以前住既地方
不過間舊屋剛剛比人拆左, 起緊新樓
屋前棵幾層樓高既龍眼樹都比人斬左
所以無咩好影
再走返出去外面, 公廁旁邊本來有棵大樹
大時大節好多人聚係下面賭錢的, 哈
而家都無左lu
以前既田地/空地都填平晒, 起晒樓了
短短行左個半鐘就離開
__________
以前小坑村無小巴
出入都要靠一D叫"白牌"既車, 即係白色既van仔
只不過後面係坐人, 並唔係載貨
__________ May 03 黑夜逃亡難得有三日休息
抽一日出黎踩單車
屯門新墟出發, 經南生圍, 流浮山, 白泥, 返屯門
屯門元朗天水圍一日踩晒
朝早十點幾出發
係新墟一單車舖租單車, $50一日
沿單車徑踩去元朗南生圍
陽光好猛
未到南生圍我已經有些少晒傷既感覺
踩左兩個鐘之後終於到左南生圍
我地將三部單車搬上橫水渡, 初頭有諗過架艇可唔可以落晒三部單車
划艇個伯伯話: 六部單車都無問題!!企定就無問題
伯伯無因為多左三部單車而額外收費
今日天氣實在太好
南生圍有好多人
仲見到兩對新人影婚紗相
係南生圍行完一圈就沿路返轉頭
向流浮山出發
踩到去天水圍既時候已經有點累
三點幾到達流浮山
可以話我第一次到流浮山
搵左個有得泊單車既地方食碗麵, $15一碗餐蛋麵
因為有時間剩, 太早到白泥等日落又係晒
所以我地係流浮山HEA左陣
流浮山去白泥
今次踩既係一條小徑
同踩馬路相比, 踩小徑既風景更靚
轉返出馬路之後發覺.....實在好多人入白泥睇日落
入白泥既車不絕, 踩單車既我地有時停下比車過左先
畢竟有D路段比較窄
大約六點到達白泥.....太陽已經變紅左小小
我地可算係來得正好
白泥比我地所料, 一樣係人多
天氣好就係睇日落既好日子
比預定時間遲左十五分鐘離開白泥, 時間係六點四十五分
戲玉就係呢分鐘開始
我地打算由白泥經龍鼓灘踩返屯門
誰不知當我地踩到菠蘿山山腳.....去路被封了
原來前面係堆填區!
閘口鎖左!!我地過唔到去
呢個時候...我地有諗過返轉頭, 由流浮山個邊出返去
但最尾我地做既係....爬過閘口, 由堆填區既龍鼓灘出口返去出
爬過閘口之後, 天已經夜, 我地係無街燈既堆填區入面踩....
好彩無分叉路....
後來仲比我地見到一個保安員
佢截住我地, 我地解釋左個原因之後
佢話我地知一直踩就出到去龍鼓灘, 遇到個好人啊......
保安員先生話二十分鐘就可以出到龍鼓灘
後來我知道, 保安員先生一定唔係講緊踩單車!
都唔知踩左幾耐....翻過兩條長命斜, 終於到左龍鼓灘
過左龍鼓灘後再上斜!! 上完斜, 一口氣衝落山就係蝴蝶灣!!
啊...媽的.......
我從未試過咁渴望返屯門市中心架
踩左兩個鐘之後...終於返到新墟還單車
因為遲左四十五分鐘還車, 還車個陣比老闆娘怒醒一獲勁既
$50玩足一日有多, 抵晒啦
加加埋埋踩左七個鐘單車
__________ 堆填區
聽就聽得多
完全無諗過入去裡面
__________
辛苦過體鍛
全身都好痛
__________ |
|
|||
Send a private message
Subscribe to RSS feed
Tell a friend
Add to My MSN
Add to your network
Sign up for alerts
|
|
